Trúbadorhátíð Íslands 2007

Þá er það nánast komið á hreint. Ég mun taka nett kast á kassagítar minn og misþyrma raddböndunum mínum á Trúbadorhátíð Íslands þetta árið. Það er hinn bráðgáfaði flokksbróðir minn sem er eigandi þessarar hátíðar, Guðmundur R sem skipuleggur þessa hátíð. Ég mun spila á Norðfirði á laugardagskvöldinu 6. október Á efnisskránni verða frumsaminn lög frá pönktímabilinu 84´- 85´ Sjáið þið þetta ekki fyrir ykkur, Sir Arnar uppá sviði með gítarinn í rifnum gallabuxum og grænum hermannabol sem stendur "fokk u" aftan á

Þá er það svo nokkuð ljóst að ég mun í fyrsta sinn á ferli mínum sem tónlistarmaður troða upp í Mjóafirði og er það nú að verða minn síðasti sjéns þar sem ferill minn er nánast á enda. Þar mun ég kyrja mína söngva á samt öðrum lögum þann 7. október ásamt eiganda hátíðarinnar. Ekki nóg með það, trúlega mun ég í fyrsta skiptið á ævi minni fara keyrandi í Mjóafjörð. Ég hef nefnilega farið nokkrum sinnum á bát í fjörðinn mjóa og það mundi sennilega seint teljast einhver sjómennska að sigla frá Norðfirði yfir í Mjóafjörð en það er nú samt alveg nóg fyrir mitt sjómannshjarta.

Hvet alla sem leyfi hafa til að mæta á Trúbadorhátíð Íslands 2007 sem verður helgina 5. - 7. október.