Gleðilegt ár! Stutt útgáfa af jólunum.

Gleðilegt ár öll og takk fyrir það gamla. Jólin gengu sinn vana gang hér á Starmýrinni. Jólagæsin var að venju mjög góð, var að vísu ekki skotin af undirrituðum en samt mjög góð. Ég er að spá í að gerst öfga dýraverndunarsinni því það hentar mér svo vel.

Á jóladag brunuðum við fjölskyldan norður á heimaslóðir. Þar vorum við í góðu yfirlæti mömmu og pabba og rákumst við á tvo af mínum bræðrum þar. Þar var etið og drukkið að fornum sið og fengu börnin að kynnast forn íslenskum jólasið á slóðum Jónasar Hallgrímssonar er hrútnum á stórbýli forfeðra minna var sleppt lausum í nokkrar gimbrarskjátur. Sáum við, karl faðir minn, að hrútur þessi var svo til vita náttúrulaus og gagnaðist hann gimbrunum frekar illa, enda af suðflekkóttu forystukyni.

Á Gamlársdagskvöld var svo snæddur kvöldverður hjá mínum ástkærum tengdaforeldrum ásamt því að skála fyrir nýju ári. Þar var boðið uppá rjúpur, sumar með höglum (átti engan þátt í því, ýtir enn frekar undir dýraverndunarsinnan í mér) og í eftirrétt heimlagaður ís. Eitthvað var skotið upp af flugeldum og voru allir mjög glaðir og sátti er lögðust til hvílu þessa nýársnótt.

Völvan spáir breytingum hjá mér þetta árið. Grunar að um sé að ræða útlitsbreytingu, "perustefnið" ( lesist ístran) hverfi eða eitthvað þess háttar. Annars vona ég að árið 2008 verði skemmtilegt og spennandi ár. Vona að ættingjar,vinir, félagar og óvinir, trúaðir og ótrúaðir eigi gott og farsælt ár.

Eitt svona í lokin. Mér finnst það út í hött að einhverir "Hérastubbar" þurfi að gefa ordur um það að ræsa megi varaaflstöðina þegar rafmagnið fer hér í Neskaupstað. Mér finnst að allar mikilvægar ákvarðanir eigi að taka og koma frá Neskaupstað. Við erum góðu vön. Líf austfirðinga hefur snúist um líf Norðfirðinga hingað til, Nobbarar fá þetta, Nobbarar fá hitt, Norðfirðingar kvarta og málin eru, oftar en ekki leist á kostnað annarra austfirðinga. Þetta er hægt að lesa á nokkrum bloggsíðum hjá dugmiklum austfirskum bloggurum.

Ligg heima hjá mér lasinn....

og get ekkert tekið þátt í jólaundirbúningnum. Þetta er ömurlegt.  

Jólin koma, jólin koma.....

Já það sem af er desember er búið að vera mikið að gera hjá mér. Fyrir utan að mæta í skylduvinnuna er ég búinn að taka að mér verk "Sveinka" og gleðja börnin alveg óhemju. Ég og stórbóndinn á Skorrastað brugðum okkur í rauða búninginn og lékum á alls oddi. Skemmtum við okkur mjög vel við þessa iðju og er þetta eitthvað sem maður getur hugsað sér að gera einhvern tímann aftur. Um síðustu helgi skelltum við fjölskyldan okkur svo á skíði og svo var hið árlega jólabingó knattspyrnudeildar Þróttar og gekk það vonum framar. Hafa vinningar aldrei verið hvorki stærri eða fleiri og var almenn ánægja með þetta bingó hjá þeim fjölmörgum gestum sem sóttu það. Síðan er bara að setja sig í jólagírinn og fara að dratthalast til að skreyta það sem eftir á að skreyta. Hér eru allir um það bil að detta í jólaskapið eða svona hér um bil, eða þegar öll próf eru búin og fólk getur farið að slappa af.

Hvað er femínisti? Er það kynlaus vera.

Er búinn að vera að velta þessari spurningu fyrir mér undanfarið. Ég skil stundum ekki þetta óopinbera trúfélag. Ég stóð alltaf í þeirri meiningu að femínistar vildu gera allt kynlaust, það er, að flokka ekki börnin okkar eftir kyni með litum, sem sagt litlaus ókynja börn. Femínistaguðinn Kolbrún Halldórsdóttir vill ekki að nýfæddar stelpur klæðist bleiku. Það er svo sem allt í lagi en hvað er hún að skipta sér að því í hvaða lit nýfæddu strákarnir eru klæddir í. Jú, vegna þess að við eigum ekki að flokka í kyn strax við fæðingu þetta eru rökin frá femínistum, okey mér finnst þetta vera svona bla bla rök. 

Femínistar vilja ekki heldur bera titilinn ráðherra, þeir vilja fá einhvern titil sem vísar til þess að það eru konur sem eru í þessari stöðu. Nú er allt í lagi að greina í sundur kynin. Comon, út á hvað gengur femínisti? Ekki reyna að segja mér að hann gangi út á jafnrétti kynjanna. Ó nei, annars bíð eftir því augnabliki þegar femínistar vilja að það verði til ein úrvalsdeild í knattspyrnu og liðin verði að vera skipuð konum og körlum, þá fyrst fer að vera gaman.

Alltaf stækka heimahagarnir, Öxnadalurinn.

Maður bara fyllist stolti. Var alla mína barna og grunnskólatíð í Þelamerkurskóla í Hörgárdal en ekki minnist ég þess að ég hafi fengið forseta Íslands í heimsókn á þeim tíma, enda kannski eðlilegt, því Þelamerkurskóli í Öxnadal er bara ekki til en Þelamerkurskóli í Hörgárdal er aftur á móti til. Þarna skortir blaðamanni landafræðikunnáttu eða kannski er Jónas Hallgrímsson svona mikill áhrifavaldur að hann geti stækkað Öxnadalinn eftir hentugleika. Þetta er sama dæmið og þegar talað er um séra Jón á Bægisá í Öxnadal en séra Jón á Bægisá í Öxnadal átti heima á Bægisá í Hörgárdal og bjó aldrei í Öxnadal.

En annars, til hamingju með afmælið minn kæri nágranni, Jónas

Forsetinn afhenti bók um Jónas Hallgrímsson í Þelamerkurskóla

Hrátt kjöt fyrir framan dyrnar hjá mér.

Þegar ég var að fara út úr húsi heima hjá mér í morgun þá lá þar steindauður fugl. Og ekki nóg með það heldur var búið að hamfletta hann og pakka honum inní poka, mjög vandlega. Ég horfði góða stund á þennan gjörning og var að spá í það hvernig í ósköpunum fuglinn hefði farið að þessu, datt reyndar í hug að einhver væri að gera grín að veiðiafla mínum þetta haustið en enginn fugl hefur ennþá ratað í höglin úr fjan...hólknum (verð að passa mig að blóta ekki mikið, presturinn gæti lesið þetta) þetta árið. En svo sá ég kveðjubréf til kennarans sem býr í sama húsi og taldi ég að þar með væri ég búinn að finna skýringuna á þessu og hver hefði sent þetta. Ég leit sem snöggvast á bréfið og á því stóð Svartfugl,  hausinn á mér sprakk úr spurningarmerkjum sem fuku út í loftið. Ég vissi vel að kennaranum þykir svartfugl ekki góður matur. Ég las lauslega yfir bréfið og fór að átta mig á því um hvað málið snérist, ég leit á gegnsæja póstkassann minn og sá þá að hann var fullur af ritgerðarverkefnum sem nemendur höfðu verið að skila til kennarans og umfjöllunar efnið var SVARTFUGL bók eftir Gunnar Gunnarsson. Skáldsaga byggð á sannsögulegum atburðum um morðin á Sjöundá.

Þetta er algjör snilld og skora ég að viðkomandi að gefa sig fram en hann eða hún gleymdi að kvitta undir verkefnið og fær því væntanlega 0 í kladdann.

Sumir morgnar eru betri en aðrir.

Á leið minnar til vinnu í morgun þá sagði Gestur Einar, útvarpsrumur, mér skemmtilega frétt. Þannig er mál með vexti að ég hef alltaf haldið því fram að maður sem er aðeins yfir kjörþyngd sé í raun í góðum málum. Gestur benti á nýlega rannsókn þessu til sönnunar að fólk sem væri 5-15 kg. yfir kjörþyngd væri með mun meiri lífslíkur en annað fólk. Þetta eru frábærar fréttir fyrir mig þar sem ég telst til þess einstaklings sem er 5-15 kg. yfir kjörþyngd. Rannsóknin leiddi að vísu í ljós að þessu fólki væri hættara við að fá sykursýki 2, en það er nú kannski hægt að díla við það, en líkur á krabbameini væri mun minni en hjá fólki sem væri í kjörþyngd svo ekki sé nú minnst á þá sem eru undir kjörþyngd. Það er að vísu einn hængur á þessu öllu saman en hann er sá að þessi rannsókn er bandarísk  svo það er spurningin hvar kjörþyngdar viðmið bandaríkjamanna eru. Erum við kannski að tala um 25-60 kg. yfir íslenskri kjörþyngd eða hvað?

Sir Alex Ferguson, formaður enska knattspyrnusambandsins.

Nú á að fara að byrja á dómarataktík Ferguson´s. Dylja skal upphaf dómaraáhrifa Sir Alex á öryggismálum á leikvöllum. Hann sem sagt upplifði það í leiknum gegn Arsenal að hann tapaði stríðinu við áhangendur Arsenal um að hafa áhrif á ákvarðanir dómarans. Og nú ætlaði kallinn að reyna að hafa fyrirfram áhrif á störf dómara með því að segja að dómarar eigi ekki að láta áhorfendur hafa áhrif á ákvarðanir sínar. Hann er klókur kallinn en þó ekki, hann hefði kannski átt að byrja á því að díla fyrst við enska knattspyrnusambandið og fara svo og beita áhrifavaldi sínu gagnvart dómurum. En hann getur svo sem sagt nánast hvað sem er í fjölmiðlum, því hann veit að það hefur áhrif og þó hann fái einhverja áminningu eða sekt þá skiptir það hann engu máli.

Og af hverju er man.utd að gera skýrslu af þessu máli, á ekki enska knattspyrnusambandið að standa í svona löguðu?

Man.Utd gerir skýrslu um ólæti á Emirates

Stærsta lokaða rennibraut landsins.

Skrapp í sundlaugina á sunnudaginn. Og það var eins og mig grunaði, stærsta rennibraut landsins var lokuð og núna er talað um "stærstu lokuðu rennibraut landsins". Maður veltir fyrir sér tilgang rennibrautarinnar. Ég hélt að hún væri fyrir börnin að leika sér í. Einhver sagði að hún væri búin að vera lokuð í þrjár vikur og ef það er satt þá fer maður að spyrja sig tilhvers var verið að gera þessa braut. Einn starfsmaður sagið við mig í haust að það væri þvílíkur munur eftir að rennibrautin kom að fólk úr nágrannabyggðarlögunum væri að koma sem er jú mjög jákvætt.

Þetta er að vísu ekki það eina sem er lokað eða kannski réttara sagt "má ekki nota" í lauginni. Þar er t.d. eitt stykki sveppur og foss sem komu þarna upp er nýja vaðlaugin var tekin í notkun sem ég  man eftir að hafa séð einu sinni í gangi frá opnun. Hvað er málið? Tíma menn ekki að nota þetta, kunna menn ekki á þetta eða kostar þetta meiri vinnu fyrir starfsfólkið þarna? Ég er gjörsamlega hættur að skilja af hverju hlutirnir eru ekki notaðir.

Jolla í 3. deildina.

Þetta er fínt. Látum þennan veruleikafirrta Eyjólf klára þessa keppni með þetta landslið okkar og svo getur hann fengið þjálfarastöðu á Seyðisfirði eins og Einar Bragi hefur bent á á sinni bloggsíðu. Frábær hugmynd og góður húmor í henni. Eyjólf á Seyðis.

Eyjólfur: Ég er ekki kominn í þrot með þetta lið