KFF snýr dæminu við og Séra Jón á Bægisá var ekki frá Bægisá í Öxnadal

Já stelpurnar í KFF unnu loksins leik síðast liðinn mánudag. Eftir brösugt gengi undanfarna leiki þá kom góður sigur þeirra á Hömrunum sem endaði 3 - 1. Þær höfðu að vísu spilað við Hamrana viku fyrr fyrir norðan og töpuð þar ósanngjarnt 4-2 svo þær vissu upp á hár hvað þurfti að gera til að snúa dæminu við.

Annars lagði ég leið mína upp á Hraunsvatn í Öxnadal á mánudaginn með fjölskyldunni minni og var það hreint út sagt frábært. Þetta er gríðarleg náttúruperla sem tengist Jónasi Hallgrímssyni skáldi. Jónas var gott skáld og það var Séra Jón Þorláksson frá Bægisá líka, en hann er jafnan kenndur við Bægisá í Öxnadal sem er eitt mesta bull sem kennt er í íslenskum námsbókum í dag. Séra Jón Þorláksson bjó á Bægisá á Þelamörk sem tilheyrir Glæsibæjarhreppi og Glæsibæjarhreppur hefur aldrei verið í Öxnadal og mun aldrei verða. Kenning mín er sú að það hefur þótt bara auðveldara að kenna hann við Öxnadal því Jónas Hallgrímsson var svo helvíti flott skáld og var frá Hrauni og síðar Steinsstöðum í Öxnadal og bærinn Bægisá er til í Öxnadal.  Þeir eru reyndar tveir Bægisár bæirnir annar heitir Syðri - Bægisá og er í Öxnadal og hinn heitir Ytri - Bægisá og er í Glæsibæjarhreppi á Þelamörk og þar var prestsetur fram á 20. öld. og þar bjó Séra Jón Þorláksson. Þessari villu þarf að koma sem fyrst út úr kennslubókum nútímans.

Athugasemdir

[Guðmundur Örn Jónsson, 12.7.2007 kl. 12:32]

Ég hef grun um að finnst kollegi minn Jón Þorláksson hafi verið svona gott skáld þá hafi menn einfaldlega reiknað með að hann væri úr Öxnadalnum, enda marg sannað að þaðan kemur yfirleitt allt það sem best er.